Bya Maria Gorreth Namisagga
Mmengo – Kyaddondo
Katikkiro Charles Peter Mayiga atongozza bboodi y’ebyobusuubuzi mu Bwakabaka etuumiddwa ‘Mmengo Chamber of Commerce Limited’ ekulemberwa Omuk. John Fred Kiyimba Freeman.
Katikkiro wa Buganda munnamateeka Charles Peter Mayiga akalaatidde olukiiko olulondeddwa okuyitimusa ebyobusuubuzi mu Buganda ng’annyonnyola nti obusuubuzi bwava dda, mu Buganda wano era by’ebimu ku byanyweza enkolagana ya Buganda ne Bunyoro. Ategeezeza nti abantu balina okubeera abayiiya mu byobusuubuzi, era bwatyo n’asaba abalondeddwa okulambika abusuubuzi mu nkola ennungamu, nga bakubiriza abantu okukolagana n’abakugu nga bakola emirimu gyabwe.
Kamalabyonna ategeezeza nti olukiiko Ssaabasajja lwe yasiimye alwesiga , bwatyo n’abakubiriza okugabana obumanyirivu bwabwe n’abalala , basobole okuyamba abantu okweggya mu bwavu basitule omutindo gw’amaka n’embeera z’obulamu bwabwe.
“Muli bamanyirivu muli bakozi, era tusaba mugabane naffe obumanyirivu bwammwe n’obukozi, abantu abamu batya okugabana bye bamanyi, omuntu yenna asomesa abalala ayongera kugeziwala, n’olwekyo mugabane naffe tuyambe abantu, kale tulowooza nti bwemunaagabana naffe amagezi gammwe, tujja kuganyulwa nnyo, tubaaniriza era n’ebigambo ebyo nninna essanyu okubategeeza nti Mmengo Chamber Of Commerce Limited ngitongozza,” Katikkiro Mayiga.
Minisita avunanyizibwa ku by’obusuubuzi mu Buganda, Owek.Hajji Amisi Kakomo, yeyanzizza Beene olw’okukkiriza okutondebwaawo kw’olukiiko luno, era yebazizza bannamikago ababayambyeko okulaba ng’ekitongole kino kiwandisiibwa mu butongole okuli abava wano munda mu Buganda n’ebweru wa Buganda. Ayozaayozezza abalondeddwa, era n’ategeeza nti olukiiko luno alulinamu essuubi nti lujja kuyamba nnyo abasuubuzi mu Buganda okwekulaakulanya.
“Kamalabyonna ssebo, njagala okutegeeza nti nze ne bannange mu minisitule, tulina essuubi ddene nnyo mu bantu bano nga bw’obalabye bonna, bantu bakugu era ba buvunanyizibwa, nkakasa nti Mmengo Chamber of Commerce egenda kuyamba nnyo abasuubuzi mu Buganda okwekulaakulanya, okunoonya obutale, abasuubuzi okukolagana , era kigenda kutwongera embavu n’amanyi mu mirimu gyaffe egy’obusuubuzi” Kakomo.
Ssentebe w’Olukiiko olulondeddwa Omuk. John Fred Kiyimba Freeman, awezze ku lwa banne nti bagenda kunoonya ba mmemba abalala, era gwe mulamwa gwe bagenda okusookerako, kibayambe okwongera okusaka amagezi n’okutuuka ku bantu bangi, boogiwaze abali mu busuubuzi, baagazise n’abapya, ono ku lwa bonna aweze okutuukiriza obuvunanyizibwa obubasuubirwamu.
Olukiiko olutongozeddwa: Ssentebe ye Omuk. John Fred Kiyimba Freeman, amyukibwa Owek. Stephen Kayiwa, Abakiise kuliko; Omuk. Sarah Kironde Ssemanda, Owek. Ritah Namyalo, n’Omuk. Robert Nsereko, ate nga omuwandiisi era Munnamateeka w’olukiiko ye Francis Asis Kimbowa.
