Bya Miiro Shafik
Ssaabasajja Kabaka Asiimye n’alonda bboodi empya eya Leediyo CBS egenda okuweereza ebbanga lya myaka esatu (3). Bino bikakasiddwa ekiwandiiko ekiteereddwako omukono Katikkiro Charles Peter Mayiga.
Bboodi eno egenda kukulemberwa Omuk. David Balaka nga Ssentebe waayo ng’ono asuumusiddwa okuva ku bumyuka bwa Ssentebe bw’abaddeko ku bboodi enkadde, ate nga amyukibwa Omuky. Solome Nasejje Luyombo naye abadde mmemba ku bboodi empya.
Abalala abalondeddwa ku bboodi eno kuliko Owek John W. Katende, Omw. Haruna Nnyanzi Lule, Omuk. John Fred Kiyimba Freeman., Omuky. Brenda Ssekabembe, Omw. Benedicto Kiwanuka Bamweyana, Omw. Francisco Ssemwanga, ne Omuk. Micheal Kawoya Mwebe (omuwandiisi wa bboodi).
Bw’abadde alangirira bboodi eno, Owek. Israel Kazibwe Kitooke ategeezeza nti bboodi eno etuulako ba ddayirekita abalala basatu abalonderwa mu lukiiko lwa bonna nga bakiikirira emigabo gy’obwannannyini.
Mu bubaka bwa Katikkiro, yebazizza bboodi eyawummudde olw’obuweereza obulungi obuvuddemu ebibala ebirabwako, ebikuumidde leediyo y’Obwakabaka ku ntikko, era yebazizza abakiise bonna olw’ebiriwoozo bye bataddewo mu bbanga ery’emyaka omukaaga (6) gye baweereza.
Katikkiro ayanirizza abakiise ba bboodi abaggya, n’abaagaliza obuweereza obulungi n’abasaba okufaayo okulaba nga Leediyo ya Nnyinimu esigala ku ntikko.
Kinnajjukirwa nti bboodi enkadde yasiibuddwa nga 22/04/2025, era nga ku bantu abawumudde kuliko Omuk. Mathias Katamba, abadde Ssentebe waayo, Owek. Kaddu Kiberu, Owek. Joyce Nabbosa Ssebuggwawo, Omw. Mansoor Bunnya ne Omuk. Jamir Ssewanyana.
