Bya Gerald Mulindwa
Kyaggwe
Omuluka gwa Kabembe mu ggombolola Mutuba III Kyampisi mu Kyaggwe guwangudde empaka z’omupiira gw’ebigere ezitegekebwa aba ‘Buganda ku Ntikko’ buli mwaka.
Empaka zino zeetabwamu emiruka 5 egikola eggombolola Mutuba III Kyampisi okuli; Ntonto, Kabembe, Bulijjo, Ddundu, ne Kyabakadde. Zivujjirirwa Omwami wa Kabaka ow’essaza Rhinelands Oweek Samuel Ssekajugo Musoke.
Minisita w’Olukiiko, Kabineeti n’ensonga ez’enjawulo mu woofiisi ya Katikkiro, Oweek Noah Kiyimba, y’abadde omugenyi omukulu era mu bubaka bwe yebazizza Oweek. Samuel Ssekajugo olw’enteekateeka etakabanira okusitula ebitone mu bavubuka bw’atyo n’asaba abavubuka okwekuuma mukenenya basobole okwenyumiriza mu bitone by’abwe.
Minisita Kiyimba asinzidde wano n’asaba bannabyabufuzi okusembeza abavubuka nga bayita mu by’emizannyo kubanga bangi ba byettanira nnyo era bibakumaakuma ne babeera bumu.
Omuteesiteesi era omuvujjirizi omukulu ow’empaka zino, Oweek. Samuel Ssekajugo Musoke, ategeezezza nti yatandikawo empaka zino n’ekigendererwa eky’okuleetawo obumu mu bavubuka n’okutumbula ebitone byabwe bifuuke omulimu bafunemu ensimbi basobole okweyimirizaawo.
Abawanguzi baweereddwa sseddume y’ente n’ebirabo ebirala ate n’abakutte ebifo ebiddiridde bavuddewo n’ebirabo eby’enjawulo.
