Bya Arthur Kalumba
Mmengo – Kyaddondo
Minisita w’Obuwangwa n’Ennono Oweek. Dr. Anthony Wamala akuutidde abakulembeze mu Bika okwongera okunyweza obukulembeze, n’okutandikawo polojekiti ezikulaakulanya Ebika.
Minisita okwogera bino abadde asisinkanye ab’Ekika ky’e Njovu abakulembedwamu Omutaka Mukalo Ssaalongo Ssesanga David ku Bulange e Mengo.
Mu kaweefube w’okwongera okukulaakulanya n’okutumbula ebika, Oweek. Wamala azze alambula ebika ebisoba mu 38 omuli n’Ekika ky’Enjovu ku butaka bwabwe e Kambugu e Busiro.
Asinzidde mu nsisinkano eno Minisita Wamala n’asaba abakulembeze mu Bika okwongera okukunga n’Okwagazisa abazzukulu Ebika byabwe, era bakole emirimu egikulaaakulanya ebika.
Omutaka w’Ekika ky’e Njovu, Mukalo Ssaalongo Ssesanga David akunze abazzukulu okujjumbira emirimu gy’Ekika okuva mu Nju okutuuka ku kasolya Ekika kisobole okutambula nga kigenda mu maaso.
Katikkiro w’Ekika ky’e Njovu Mw. Joseph Mutaawe, asabye Obwakabaka bubakwasizeeko ku nsonga z’ekibba ttaka ku mbuga ez’enjawulo mu kika kino.
