Bya Ronald Mukasa
Bulange – Mmengo
Omuyimbi Namukwaya Hajarah abasinga gwebamanyi nga Spice Diana ataddewo ebbugumu mu nteekateeka y’emisinde gya Kabaka Birthday Run egy’omwaka 2024 bwaguze emijoozi egiwerako.
Namukwaya akunze emijoozi gya kakadde ka Uganda kalamba nakunga ne bannayuganda abalala okuvaayo bawagire enteekateeka eno.
Emijoozi gino gimukwasiddwa Minisita w’Olukiiko ne woofiisi ya Katikkiro, Owek. Noah Kiyimba naye asabye abantu okujjumbira enteekateeka eno.
Mu ngeri yeemu Loodimmeeya Erias Lukwago naye aguze emijoozi egiwerako era naasaba abantu abalala okuwagira enteekateeka eno era beekuume akawuka akaleeta Mukenenya.
Ye Minisita w’Abavubuka n’Emizannyo, Owek. Robert Sserwanga yeebazizza nnyo Omuloodi Erias Lukwago n’omuyimbi Spice Diana olwokuvaayo okuwagira enteekateeka eno bwatyo nakunga banna bitone bonna saako n’abantu ba Buganda okujja bagule emijoozi okusobola okwetaba mu misinde gino nga 7 omwezi ogw’okuna .