Bya Jjuuko Huzair Wasajja
Mengo – Kyaddondo
Obwakabaka bwa Buganda Butongozza olukiiko Olukulembeze olwa Nkobazambogo olweggwanga lyonna oluggya.
Bwabadde atongoza olukiiko luno mu Bimuli Bya Bulange Katikkiro Charles Peter Mayiga asabye bannankobazambogo okwenyigira obutereevu mu lugendo lwokuzza Buganda ku ntikko.
Kamalabyonna asiimye obuweereza bwa bannankobazambogo bano era nabakubiriza okwengera okuzimba obukugu mwebyo ebibatendekeddwa mu matendekero awamu n’okunoonya emirimo.
“Tubakubiriza okwongera okuzimba obukugu bwebyo bye musomye mu matendero awamu nokunoonya emirimu. Abavubuka basoomoozebwa nnyo mu kunoonya emirimu era tewali kubuusabuusa nti abavubuka abatalina mirimu bakola ettunduttundu ddene nnyo mu bantu abatalina mirimu mu Ggwanga” Katikkiro Mayiga.
Mukuuma ddamula era asabye bannankobazambogo bano okukuuma obwasseruganda Nkobazambogo bwebazimbyemu era nabakubiriza okwongera okukolera awamu.
“Nkobazambogo ebazimbyemu obwasseruganda nga muli matendekero gye mutendekero. Tubeebaza nnyo omwoyo gw’okukolera awamu nga muyita mu buweereza buno bwemukola, okwerambula mu mabendobendo gye musomera, okuyambagana mu banaffe abetaaga okukwatirako. Bino byonna bikulu nnyo mu kuzimba omulembe ogwamaanyi nga muli muntu alina obuvunaanyizibwa ku mulala era tubasa empisa eno mugitwale mu maaso. Nebwemuba mufulumye amatendekero musigale nga mutambulira awamu nga munoonya emirimu n’emikisa emirala naddala abali mu bukugu bwebumu, mujja kwanguyirwa nnyo ensi” Katikkiro.
Katikkiro akubirizza abavubuka bano okugatta omutindo ku mirimo ejibayigiriziddwa mu matendekero gaabwe.
“Ekyomukisa omunene nti musomye, abamu emirimu egyo gyennyini gye musomye gyemukola, mulina okulwana okugigattako ‘’Omutindo’’ n’okugikulaakulanya. Bwekuba kulima mmwanyi, naawe tandikiraawo, bweriba ttaka nga weeriri likulaakulanye, bwekuba kulunda nkoko, lunda, obukolero obutonotono n’obuweereza obwabuli ngeri yonna mu bukole musobole okutikkula abazadde omugugu era mufuuke ekitangaala mu mpya zammwe” Katikkiro.
Minister wa Buganda ow’abavubuka emizannyo n’ebitone owekitiibwa Robert Sserwanga agambye nti boongedde amaanyi mu kubunyisa Nkobazambogo mu matendekero agenjawulo okwetoloola eggwanga lyonna.Minista agamba nti asanyuka nnyo okulaba nga waliwo abakulembeze Abaganda abali mu bifo eby’enjawulo, abakola emirimu egy’enjawulo era abagenda mu maaso n’okuweereza bantu b’omutanda.
Minisita era akkatirizza nti abavubuka bwebaweebwa omukisa, okubayigiriza n’okubakulakulanya, basobola okutuuka mu bifo ebikulu era ne bakolera abantu baabwe kubanga obukulembeze bw’enkya butandika leero.
Omubaka wa Paalamenti owa Bukoto South nga yaliko Ssentebe wa Nkobazambogo mu ggwanga lyonna Kizza Hakim Ssawula asabye bannankobazambogo obutatiiririra Kabaka.
Abadde Ssentebe wa Nkobazambogo ow’e ggwanga lyonna Ssemuju Moses Mwanje agambye nti bakoze ebintu ebitumbula Obuwangwa, Obutonde bw’ensi nga bayita mu Kusimba emiti n’okutumbula ebyenfuna Bya bannankobazambo nga bayita mu kutereka ensimbi bwatyo kwekusaba Obukulembeze obuggya okutwala omukululo ogwo mu maaso.
Ssentebe wa Bavubuka mu Buganda Munna mateeka Derick Kavuma asabye bannankobazambogo okusitula omutindo mu byebakola n’okubeera abeesimbu eri Buganda .
Ssentebe wa Nkobazambogo oweggwanga lyonna omuggya ye Nalujja Rachel, Omumyuka we ye Kizito Pius, Waswa Paul Muwonge muwandiisi, Omukubiriza wolukiiko ye Nakamatte Sylvia, Ssemmanda Alaphat Kakooza munnamateeka, Ssango James waamawulire naabala. Abyizi okuva mu matendekero agenjawulo okuli Makerere University, Kyambogo University, Muteesa I ROYAL University, Buganda Royal Institute n’amalala beyiyye mu bunji ku mukolo guno era bano bakiise n’oluwalo lwa bukadde obusobye mu busatu.
