Bya Gerald Mulindwa
Mityana – Ssingo
Abayizi bakubiriziddwa okweyambisa emikisa gyonna egibajjira nga bali mu masomero okusobola okutangaaza ebiseera byabwe eby’omumaaso.
Bino byogeddwa akolanga omumyuka wa kaminsona avunaanyizibwa ku sikaala n’ensonga z’abayizi mu minisitule y’ebyenjigiriza n’emizannyo Mw. Kyozira Peter, bw’abadde yetabye ku mukolo gw’empaka z’okwogera mu bantu ssaako okuggalawo kalenda y’ebisomesebwa ebweru w’ekibiina ku MUMSA high school Mityana.
Okusindana kubadde mu miteeko esatu okuli Lower secondary (S.1&2), Middle secondary (S.3&4) ssaako upper secondary (S.5&6) era kwetabiddwamu enju 4 okuli; Bemba, Jjunju, Kimera ne Kintu. Empaka z’okwogera mu bantu ziwanguddwa enju ya Kintu n’obubonero 558 n’eddirirwa Jjunju ne Kimera abasibaganye n’obubonero 542 ate Bemba n’efuna 537.
Ku lunaku lwe lumu, abayizi bakungaanyizza ensimbi z’okugula satifikeeti eziwagira emirimo gy’Obwakabaka era ensimbi 3,806,900 ze zikungaanyiziddwa abayizi nga basinziira mu Nju zaabwe. Jjunju basonze 1,231,500, Kintu 740,000, Kimera 710,000 ne Bemba 405,400.
Ku nkomerero, enju ya Jjunju eyasinze okukungaanya obubonero obungi mu mwaka gwonna okuva mu nteekateeka ezenjawulo okubadde football, netball, volleyball, music, dance and drama ,athletics, essay writing competitions, public speaking competitions n’okugula certificate za Buganda yaweereddwa engabo n’ekikopo ssaako akakadde k’ensimbi.
Jjunju yakungaanyizza obubonero 276.1 n’eddirirwa Bemba eyafunye 230, Kimera 224.4 ne Kintu 218.6.
Akulira essomero li MUMSA High School Mityana era Minisita wa Gavumenti ez’Ebitundu n’okulambula kwa Kabaka Oweek. Joseph Kawuki asinzidde ku mukolo guno n’akkaatiriza obukulu bwa buli muyizi okufaayo okuzuula obusobozi bwe n’okukozesa omukisa okubuzuukusa bw’aba mu somero erimuwa omukisa.
Ono era asabye ministule y’ebyenjigiriza okulafuubana okutunula mu miwaatwa egiri mu by’enjigiriza bya Uganda; okugeza, okwekkaanya amasomo g’enkizo kyokka agatali ga buwaze nga eby’obulimi, ennimi ennansi n’amagezi ga kompyuta, Okuwa omukisa bannansi bonna okuweererwa mu nkola ya statehouse sponsorship nga bwekiri mu nteekateeka endala eza gavumenti okuweerera abaana b’eggwanga ssaako okutunuulira emiwatwa egiri mu nteekateeka za district ‘quota admissions scheme’. Asabye gavumenti okukakasa nga buli ssomero libaako eby’okuyiga ebweru w’ekibiina wakiri bibiri bye lissaako essira.
